إخواني الكرام ... السلام عليكم ورحمة الله وبركاته








لأن الحاجة تدعو البشر الى التفكير في الحلول . فقد نحتاج الي تطوير بعض الأفكار أو دمجها للحصول على أفضل الأدوات من حيث الحجم وتعدد الإستخدام وقلة التكاليف ....




الفكرة :-


دمج عصا نشيب الصيد مع لمبة المغناطيس العادية






السالفة :-





طلعنا للصيد في احد ايام السنة قبل الماضية وحصلنا والحمد لله خير , لكن يوم جا الليل وبغينا نطبخ العشاء جانا أعزكم الله حشرات والحشرات طبيعية بالبر ولكن كانت الحشرات بكميات غير طبيعية ابد , وكانت من نوع غريب , تهاجم النور وتظرب ظرب باللمبة وفي وجيهنا وفي القدر علشان نور النار لدرجة إنك ما تفتح قدرك الا ويدخل فيه خمسين مية , واعدنا حمس الكشنة 3 مرات وكل مرة تخرب ونكبها . قلنا نطق الخيمة الصغيرة الي معنا وندخل كلنا دفعة وحدة بالظلام ونقفل الخيمة ثم نشغل النور , لكن لازم نطلع بعض الأحيان علشان حاجاتنا , وفي أول فتحة للخيمة صارت تدخل لأن اللمبة قريبة من الخيمة بس اشوا شوي طبعاً إذا جا يطلع أحد نطفي النور بس هي تدخل على نور القدر لأن اللمبة جنب الباب وبسرعة يمديها تدخل , هنا أحتجنا نرفع النور مسافة عالية شوي وكانت الفكرة رفع اللمبة كم متر وهي برا الخيمة بواسطة (عصا نشيب الصيد) وبعد كم تلفيقة بالأسلاك الين طولنا اللمبة , وكانت الإضائة برا الخيمة وبعيدة وضعيفة . بس أهون شوي ,نشوف شوي لأن الخيمة بيضاء وخفيفة .






بعدها بديت أطور على الفكرة الين خرجت بالشكل هذا













وآسف أذا هي فكرة أحد غيري , ولا أدري بصراحة إذا أحد فكر فيها قبلي بس قلت أنزلها وإعتبروها هدية عودة المنتدى بعدتغيير مكينته.




1- سميتها لمبة القناص


2- إستخداماتها :-
· يستخدمها القناص لمبة وعصا لنشيب الصيد .
· إذا كشتتك في مكان واطي بالطعوس وتخاف يدرعم عليك أحد من المطعسين بالدبابات أو السيارات أرفعها الى آخر مدى .
· ممكن تميلها وترفعها وتزلها الين تجيبها فوق المكان الي تبيه , مثل القدر تحطها فوقه بالظبط علشان تشوف طبخك بالليل زين .
· تبعد عنك الحشرات إذا رفعتها فوق .
· ممكن تخليها إشارة للي جايك من بعيد إذا رفعتها لآخر مدى أو قعدت تشر بها كنك تخفق بعلم (بدل الفليشر) .
· ولما تجربها بتلقى فيها إستخدامات أكثر .


3- فوائدها :-
· لمبة .
· عصانشيب صيد .
· عمود متعدد الأطوال .



4- الأدوات المستخدمة :-









· عدد 2 أسلاك توصيل خاصة بالسيارات بطول 7 متر ,2مم. بـ 12 ريال
· مشابك (مقابض) أحمر وأسود . بـ 4 ريال
· لمبة 12 فولت ,أنا استخدمت (أوس رام) 100 وات . ب_ 15 ريال
· غراء (سوبر قلو) . بـ 5 ريال
· شطرطون كهرب .بـ 2 ريال أمريكي
· عصا نشيب الصيد , أنا استخدمت الي طولها 5.40 ياردة . ب_ 20 ريال لقيتها عند غالبية محلات الرحلات الكبيرة بالرياض , وهي معروفة من فترة عند بعض الناس.
· عدة .


5- مميزاتها :-
· صغيرة .
· رخيصة .
· عملية .
· متينة نوعاً ما .
· قابلة للتفكيك والتنظيف .
· خفيفة .
· قابلة للتعديل في الطور حسب الحاجة من نص متر الى 4 متر .
· قابلة للتثبيت بأكثر من مكان في الموقع (بين حصى , على شجرة , بالسيارة , بالغرس بالرمل ,,,,,)


6- من عيوبها :-
* تحتاج الى تأني وطريقة معينة في تصفيطها (حوالى دقيقة إذا عرفت وتعودت عليها )


7- تركيبها :-


· لأن ما لقيت أسلاك سيارة لاصقة ببعض أضطريت إني الزقهم بالغراء ببعض بالغراء (سوبر قلو).








· إسحب الوصلات الأولى من العصا وذبها (حوالي 3 وصلات) الين توصل للوصلة الي ممكن يمر معها السلك .





· افتح فتحة بسدادة العصا الخلفية لدخول السلك منها .






· مرر السلك من خلالها .





· دخل السلك في الوصلة الى على مقاسة الين يطلع مع الجهه الثانية .





· دخل الوصله في الوصلة الي أكبر منها على طول بالعصا .





وصل اللمبة بالسلك بحيث يكون الأسود أطول شوي من الثاني علشان يتساوون بالطول , وهنا ملاحظة ( السلك الموجب باللمبة تلقى عليه واقي من الحرارة حاول إذا قصيت من هالسلك تاخذ الواقي الي علية وتركبه على السلك السالب الطرف القريب من اللمبة علشان الحرارة برظو . وهنا انا ما سويتها لأني ما عرفت هالملاحظة الا بعد ما جربتها بالبر زي ما هو بالصور الأولة , لأن الحرارة تميع السلك السالب القريب من اللمبة ويدخن ويميع على السلك الموجب بس بعد ما ركبنا الواقي وحنا بالبر مشت الأمور تمام التمام .







· ركب المشابك .





· ركب السدادة الخلفية .






· وحاول تقص بشويش من الوصلة الأولى من فوق الين تدخل اللمبة مكانها صح بالعصا .









· ركب السدادة الأمامية .





وصار معك لمبه طولها من نص متر الى 4 متر تشتغل زي اللمبه العادية (المغناطيس ) تشبكها على سيارتك واللمبة محمية داخل عصا النشيب إذا صفتها وما تكسر من المطامر بالبر زي اللمبة المحفوظة في جراب قماش , وفيه أنواع لعصا النشيب لقيتها أطول من كذا بس دبل السعر مرتين وهذى كفاية جداً


ولقيت لها جراب تقو تفصال لها عند محل رحلات ب 12ريال وذفه بس ما صورته