قال الأول

إذ جاء الفقع فصرّ الدوا ... وإذا جاء الجراد فكب الدوا


بسم الله الرحمن الرحيم

الحمدلله رب العالمين ولاعدوان الا على الظالمين والصلاة والسلام على

اشرف الأنبياء والمرسلين وبعد /

أخوتي الفضلاء النجباء معاشر اعضاء مكشات الشرفاء

سلام الله عليكم ورحمته وبركاته


وبحكم اننا الآن في موسم الجراد ووقته
حبيت انعشكم بكم صورة توسعون عليها الصدر
وتقرمشون كم جرادة بعيونكم في هالصور
ولامانع من اللعق اواللحس لصور هالجراد هههههه
فربما يفقد بعضكم صوابه ويسعبل من حيث لايشعر
فلا حرج في ذلك هههه



اخوتي الغالين
الى لب الموضوع وقلبه وقالبه
في صبيحة يوم مبارك وعند تصفحي لمكشات وبعد الفجر مباشرة
تفاجأت بموضوع يخبر فيه أحد الأخوة الأعضاء بوجود الجراد في السوق
طار صوابي والشوشة انتفشت هههه وبغيت اسوي فركه واجحد الدواام وازرق للقصيم واجيب هالجراد واوسع صدور الوالدين
ففي كل سنة اتلمس الأخبار عن الجراد والحمدلله اوفق دائماً واكون أول من يشريه من الجماعة واوزعه على الربع والي حولي
ويطرح الله به البركه واسمع الدعاء من هالعجز وهالناس الي مايصدقون بشوفته
المهم وكعادة الأخوة الأعضاء الشقردية حبهم لخدمة الغير وسعيهم الحثيث في طلب الخير ونخوتمهم وعروبتهم وشهامتهم توجب عليهم ذلك
فاصبح هذا الخلق كالفريضة على نفوسهم فصار طبعاً وسجية من سجايهم
اسأل الله بمنه وكرمه وجوده أن يغفر لمن ساهم في حصولي على الجراد
أحد أعضاء مكشات من اهل القصيم جزاه الله الف الف خير ورزقه ما تمنى اشترى لي الجراد من هناك وحفظه لي الى أن وصلته وأخذته منه
حقيقة اقولها عز الله وصله دعاء دعاء من الأهل والأقارب
وايظاً مني كل ما اتعشى او اتغدى على هالجراد دعاء عظيم يستحقه اي والله
المهم اني حاولت افرك من الدواااام
ووقعت الصبح ههههه اجل متى تبي توقع الله يصلحك تبي توقع بالليل هههه وقعت الصبح الساعة ... ما ابي اعلمكم وتحسدوني هههه
المهم وقعت تقدر تقول مبكر تسذوب دايم يتأخر هههههه
المهم وابي استأذن من ابو مشاري المدير ماش ياوجه استح
ياوجه استح من كم يوم وانت توقع وتمشي ياطالع بر يازارق منا ولا منا ياناط ياقايم ياقاعد
المهم قلت اتصبر الين تجي على الأقل 11 وامشي هههه هذا مع التصبر
المهم واتصبر واتصبر واتجلد واتجلد
وماغير اصبر نفسي واردد هالبيت
وتجلدي للشامتين اوريهم ..... اني لريب الدهر لا اتضعضع
هههههههههههههههههههههههههههههههه صارت حرب وامور حاسمة ههههه
والله وصرت صبور وجت 11 قلت ابو مشاري قال سم قلت جعلك تسلم توصي بشي قال سلامتك يابو حمد قلت الله يسلمك في امان الله هلاهلا نشوفك على خير ابو حمد
ووشت على الموتر
ووشت على غيار الزيت
ووشت على البيت وآخذ العزبة وأموري وخذت الغداء في الحافظة ماقصرو الأهل بكرو به جعل من خلّفهم في الجنة
وامشي الساعة حول 12

وانا في طريقي وقبل بريده بــ 70 كيلو تقريبا

واتحقق واتحقق الينه والله عج مقبل قلت الحمدلله وشغلت الكمره ولقطت لكم كم صورة

وهذي وحدةً أخرى

وقبل القصيم بثلاثين كيلو تقريباً جيت الأرض الينها ممطورة مطر طيب قلت الحمدلله
المهم
وصلت للقصيم واستلمت الجراد جعل من وصله بالجنة وغفر الله له ووالديه والله يرفع قدره وييسر امره ويرزقه من حيث لايحتسب
وعلى طول مريت السنيدي ونزلت عنده الطبق العجيب حق الربع الباترول نعم الطبق العجيب يصير عندك طبق ومرتبة وسرير و .. و ... سترونه قريباً نزلته عنه لعشان يلبسه تلبيس محترم
طلعت من السنيدي وزرت الأخ الفاضل الكريم ابن الكريم أحد أعضاء مكشات
الذين اكن لهم كل أحترام وتقدير ونعم الرجل هو ووالده المحترم فبحق هم أسرة عريقة ورجال أفذاذ لاكت أقدامهم الجزيرة العربية
وصار لهم صولات وجولات
فنعم الرجال رجالهم فهم سادة محترمين وأسود لاتهاب

يكفي ان منهم ... والله لولا الخصوصية لأخينا الغالي لذكرت شجعانهم وأسودهم الذين طوو الجزيرة العربية طوي الخيل المظمّرة
سراع لايهابون الموت يبتغون مظانه
إنه العضو نقا خريم غفر الله له

واستقبلني بالترحيب وأخذت معه فنجال وكسرة عود هو ووالده وسوالف واعلوم وطلعت منهم قبيل المغرب
وعلى الرياض وفي الطريق طريق القصيم دار اتصال بيني وبين الأخ المربي الوقور
المحترم المشرف القدوة ابو فهد (( مسافر 1 ))

فوالله انه نعم الرجل كرم وحسن أدب ومن سلالة رجال
عرف عنهم الديانة وحسن العمل والمقصد
وسريرة نقية هذا مانعلم عنه والله حسيبه
وبعد إصرار منه وعند علمه غفر الله له عن مروري مع طريق القصيم
ابت شهامته وكرمه ونبله وخصاله الحسنة أن أمر ولم ازوره
فاعتذرت واعتذرت لتأخري عن الأهل ولظروف وارتباطات
وبحكم انه من ديرة على طريق القصيم فقال بلسانه غفر الله له (( باطلع لك على طريق القصيم بالقهوة وخل نشوفك
ولانيب مأخرك ))
فتممت له وقابلته فلآاله الا الله كان جلوسي معه ساعة واحدة
ربما تزيد قليلاً ولكن والله لقد استفدت واستفدت
اسأل الله أن يجمعني به في دار كرامته
ومشيت منه ووصلت للرياض وعلى المنزل وتفاجأ الأهل بالجراد

قولو ماشاء الله ترى هذا عقب ماوزعت بعظه هههه

وهذي نمونة منه
ياقدمه هههههه نمونة من يقولها هالوقت
بس قلت اذكركم بالتراث اكيد بيعرف هالكلمه سرهيد

المهم جريت الجراد جر بسفرته للمطبخ ويالله أنك تعين وتسدد

وولمت المطبخية حقت المعازيم
ووضعت مقدار الماء وستشاهد في الصور الجاية

وخليت الماء الين طبخ وفار وهذا افضل شي في طبخ الجراد
انك تحط الجراد والماء يفوح


وفي فترة فوران الماء جلسنا نلقط في الجراد ونخم منه الي نقدر ونسوي له فرز اول شي في مثل هالسطل الي تشوفون ربما يستغرب البعض ليش تسوي كذا يابو حمد اقول تابع وسترى لماذا هذا الحرص في فرز الجراد وتنقيته






حدّر معي وشف الصورة تحت وشف البلاوي الي موجودة مع الجراد

حصى وقليل من الأسيام وبعض الأعواد ولو وقفت على الأعواد كان ماهي مشكلة لكن وجود اشياء غريبة
المهم لابد انك تخم بيدك وتنقي وسط السطل من اجل صحتك ياغالي

تصدقون من التعب وكثر ما نطارد الجراد ويطير منا اني تمنيت اني ادخل انا والخيشة حقت الجراد وسط السطل ههههه وادهن خيّرهن الين اخلص من الخياش كلها ثم اقول طلعوني واطلع هههههه

المهم شف البلاوي عاين زين او تمقل او ناظر على قولت البعض او بص ياوواد





المهم

ويوم فاح الماء وانا الي انكت الجراد فيه ولابد تكون حذر وتغطي طباقة القدر قبل مايطير شي منه

وبعد شوي فتحته ونكت الملح فيه وجمع وجمعين وثلاثة واربعة واعهه الينه منكت في القدر

وصار ميزان لامالح ولاخانس (( لا احد يعاين او يشوف طرف الكم ترآه وسخ هههه من هالحوسة الي تشوفون ))






وهذي لقطة لنكتت جمع من الملح ههههه






وتركته يطبخ ولمدة نصف ساعة ولو زادت قليلاً فلا مانع

ووقت الطبخ يزيد وينقص بحسب كثر او قلّة كمية الجراد واحرص على تقليبه كل 10 دقايق لأن الجراد يرتفع فوق الماء مثل ماتشوف





ولحرمة تصوير ذوات الأرواح تركنا بعض الصور للجراد وهو يتقرمش بين اليدين

عموماً موفقين ياغالين

واقول لكم لايفوووتكم الجراد ترآه دواء

مثل ماقال شيبانا الأولين

اذا جاء الفقع فصر الدواء واذا جاء الجراد فكب الدواء

يعني ان الفقع مشاكله وبلاويه كثير والجراد عافية بأمر الله سبحانه بل هو غذاء مهم وضروري ولذلك قالو كب الدواء فلا حاجة فيه

فالجراد بروتينات مركزة وفوائده عميمة ويعتبر مغذي وينفع للمتزوجين بالحيل بالحيل ههههههه

وخلو عنكم سالفة مرشوش وما مرشوش اصلاً اذا رشوه خلاص يبي يموت وانت اذا شفته بالسوق يناقز وحي اكثره ادر انه طيب ولابه الا العافية

وفي الختام تقبلو محبتي وتقديري ياغالين

مشكور اخى العزيز على هذا الموضـــوع
الممتاز الله لا يحرمنا من جديد ابدعاتكم
الجميله لك خالص تحياتى ولكل اعضـــاء
منتديات طعس الكرام المبدعين خالــص
تحياتى وفى انتظار الــجــديــد الــمــمـيز
تقبل مرورى
اخوكم
بكرى ومختار